好多注重健康睡眠嘅媽咪爹哋，都會好想能夠制定時間表，畀BB好好休息
的確，穩定嘅作息時間，唔單止能夠令BB瞓得好啲，而且大人亦比較容易去安排活動（講緊幾時買餸煮飯做家務咋 ）
更理想嘅係定實埋餵奶時間，咁每日有晒規律，執行上容易啲，唔怕會亂晒。
之不過，現實嘅情況係，啱啱出世嘅BB，唔可能完全跟到一個定時瞓覺定時食奶嘅時間表。
所以，一般嚟講，建議頭6個月跟清醒時間安排作息，唔好跟鐘
如果BB只係瞓咗好短時間就醒咗，可以試吓氹一陣，瞓唔返嘅話，調整下一覺時間就得。
到咗5個幾月大，如果之前一直有依照BB嘅生理時鐘去安排日夜作息，BB冇欠落太多睡眠債嘅話，就會見到BB慢慢發展出佢嘅睡眠模式。
之後去到6個月就可以編定時間表，幫佢穩定作息嘞
但要記住，唔好諗住定咗個時間表，就要「令」BB跟到呀！
你要做嘅，應該係視乎BB嘅情況，去逐步調整時間表，搵出最適合當時BB需要嘅作息時間。
除此以外，因為睡眠需要不斷下降，作息時間表會需要不斷調整，尤其係頭1年。
所以，學識點樣去調整時間表，非常重要
最後，同大家分享之前一位媽咪嘅經歷同感受
Janet媽媽：
「BB兩個月仲好細，我覺得未必要咁固定啲時間表，你想固定都未必可以，可能會累壞你自己之餘，也未必對BB最好。我仔仔而家5個月，先自己慢慢發展出 fit佢的時間表，而且未必個個feeding/ napping sessions 都固定tim。
我都係新手媽媽, 回想頭幾個月都係好崩潰, 對BB的睡眠需要又一知半解 我係參加咗工作坊同埋煲咗 Catherine page d 文邊湊邊學, 所以加油呀!
Feeding on demand 我現在回想返, 好似個個都話好好, 貼近bb需要, 但其實真心累壞湊嗰個, 我覺得不要太累壞媽媽也同樣重要。初生可能2-3個鐘就要飲奶, 可能飲完搞晒换片之類, (醒最多一個鐘?）又要再訓過...
以呢兩樣為大原則每日flexibly去因應 BB每日的狀況去nap/ feed, 可能會容易d吧? 如果bb一下子訓多過3個鐘就要叫醒餵, otherwise 我諗都係由佢訓。
咁起碼有d structure, which is guided by a few key principles, 但每天都 remain flexible to bb 當天的狀態, 慢慢你會發現bb會易湊咗 lol」
(文章由Dolce Sleepers 嬰幼兒睡眠諮詢提供)