「之前兩日同大家重溫過4個月同8個月睡眠倒退期，呢兩次倒退期主要都係由於大腦發展所引致，正面去睇其實係BB達到新嘅里程碑，不過仍然會令好多媽咪爹哋好頭痛」
之後呢一次，相對嚟講似乎好多人都「知道」應該點處理，但實際上往往係墮入咗個陷阱，令囝囝囡囡積落睡眠債，過咗一排就會開始出事...
係，好多人會話佢囝囝囡囡因為喺1歲時唔肯瞓兩次小睡，於是就轉咗每日只瞓一次晏覺...
但其實，大多數小朋友要到大概15個月大，至能夠支撐到4.5-6個小時嘅清醒時間，有啲甚至要到18個月才ready（尤其夜晚未能提早瞓嘅話，遲啲至轉比較好）。
當小朋友生理上未準備好呢個轉變，到咗瞓晏覺嘅時間就已經體力透支，結果瞓得唔穩好快就會醒
除此之外，由於覺得攰，小朋友嘅情緒亦會變得唔穩定，易因小事而發脾氣，或者痴住媽咪唔肯放，身手亦會變得笨拙容易跌倒。
咁應該點樣令囝囝囡囡維持兩次小睡呢？
1) 縮短第一次小睡嘅時間，畀佢喺下晝嘅小睡時間攰啲，願意休息一下。
2) 拉長兩次小睡之間嘅清醒時間，即係將第二次小睡嘅時間改遲半小時甚至一小時。
之不過，如果你囝囝囡囡已經接近15個月大，超過連續兩個星期都要好耐至瞓得著，又或者瞓著咗以後好快又醒返，咁或者係時候改為喺食完晏之後瞓個晏覺嘞！
(文章由Dolce Sleepers 嬰幼兒睡眠諮詢提供)