「佢個B瞓得咁好，係佢好彩嗟...」
你有冇聽過過人咁樣講，甚至可能你自己都係咁樣諗呢？
究竟，係咪有啲BB天生自然瞓得好，有啲BB就係天生難攪㗎呢？
簡單嚟講 - 係。
假設，想BB瞓得好，一共有10個條件。
有啲BB可能只係需要符合到5-6點，就已經會瞓得好；有啲BB就可能要符合到8-9點至得...
但咁並唔代表，就冇辦法令呢啲BB都瞓得好呀！
睡眠除咗天生條件外，後天培養佔嘅比重其實更大。
營造安睡環境、注意BB嘅睡眠需要，仲有我哋大人照顧BB嘅做法，以及心態，都會對BB嘅睡眠有決定性影響。
曾經有一項研究，調查咗85位媽咪同BB。
其中一個項目係，嘗試瞭解父母嘅養育方式，與BB睡眠狀況之間嘅相關性。
所有媽咪都好細心照顧BB，只不過佢哋對於睡眠嘅態度就有所不同。
研究發現，當媽咪認定BB大喊，係因為佢哋好辛苦，需要大人嘅協助至能夠瞓得著，咁佢哋自然會採取比較主導嘅角色，去安撫BB瞓覺，呢啲BB夜晚亦會醒得較頻密。
而另一批媽咪相信BB天生就識得瞓覺，唔係次次都要人氹至得，佢哋就比較願意放手去畀BB嘗試同練習，呢啲BB嘅夜醒情況亦冇咁嚴重。
(文章由Dolce Sleepers 嬰幼兒睡眠諮詢提供)