「睡眠之所以成為好多父母最頭痛嘅問題，係因為睡眠並非直線式發展嘅。」
用廣東話嚟講，即係會時好時差，成日估佢唔到
今個星期，想同大家重溫一下 – 睡眠倒退期
其實，睡眠倒退期，並非真係倒退，反而係一個躍進，係因為BB喺生理或心理上達到一個新嘅里程碑，所以令睡眠受到影響。
第一次倒退期發生喺BB出生後4個月，惡夢好多時就係由呢個時候開始
好多BB一開始都係天使寶寶，好快已經戒咗夜奶，可以一覺睡到天光。但係過咗幾個星期，突然開始成日半夜驚醒大喊，日頭亦瞓得唔長。
到底發生乜嘢事呢？
如果你囝囝囡囡出現以下幾種情況，就應該是步入4個月睡眠倒退期嘞！
半夜醒得好密
日頭唔肯瞓，或瞓得唔長
經常大喊或扭計，點樣安撫都平伏唔到
胃口突然變好或變差
雖然稱之為4個月睡眠倒退期，但有啲BB可能喺8個星期大時，就已經出現以上情況，有些BB就可能要5個月大時至會受到影響。一般而言，最常發生嘅時間係3個半月至4個月大時。
點解會出現睡眠倒退呢？
BB喺啱啱出生後幾個星期，好多時候都係喺深層睡眠之中，有時甚至點叫都叫唔醒，就連肚餓都仍然繼續怒瞓（所以會咁早戒咗夜奶）。
當BB去到3-4個月大時，大腦發育漸漸成熟，開始同成年人一樣，會喺深淺睡眠週期之間循環，銜接期間會郁嚟郁去或者大喊。
好多時，BB喺半夜驚醒哭鬧，係因為佢哋習慣咗奶睡、搖睡，及抱睡等等入睡方式。所以，BB一旦喺睡眠週期完結時醒咗，就冇辦法自己瞓返，需要你出手協助至能夠再次入睡嘞
4個月睡眠倒退期係一個重要嘅里程碑，對個別BB嘅影響程度各有不同。喺呢個時期，建議盡力協助BB入睡，畀佢瞓得足啲先（要瞓幾多請睇留言嘅連結），等2-3個星期，睇吓情況有冇改善。如果BB仍然醒得好密，咁就係時候改變入睡方式，畀佢習慣喺床上入睡嘞！（點樣做？參加健康睡眠工作坊啦！）
要戒奶睡抱睡嘅方法有好多種，要視乎BB現時嘅入睡方式、BB嘅脾性、家長嘅育兒觀，以及家庭環境（例如BB瞓嬰兒床定同大人同床）等等因素，去選擇最合適嘅方法。
當BB能夠喺床上入睡，甚至自行入睡之後，就算喺半夜醒咗，亦都無須你嘅協助，就能夠自動再次入睡，繼而一覺瞓天光。
睡眠問題，係可以解決㗎！早啲為囝囝囡囡培養良好嘅睡眠習慣，唔單止大人小朋友都能夠有覺好瞓，充足睡眠對小朋友嘅情緒，以及各方面嘅發展，亦會有好處。
(文章由Dolce Sleepers 嬰幼兒睡眠諮詢提供)
Comments